Veigar Páll: 14 kílómetrar í útileik með landsliðinu

Veigar Páll Gunnarsson þurfti ekki að ferðast langa leið til að koma til móts við íslenska landsliðið hér í Noregi enda hefur hann búið hér í Osló um árabil.

Ísland og Noregur mætast á Ullevaal-leikvanginum í Osló í kvöld í undankeppni EM 2012.

„Ég sat með sjónvarpsmenn frá norskri sjónvarpsstöð til að mæla hvað það væri langt fyrir mig að fara í þennan útileik og það voru akkurat fjórtán kílómetrar," sagði Veigar Páll en viðtalið má sjá í heild sinni hér fyrir ofan eða með því að smella hér.

„Ég er búinn að vera hér í Noregi í átta ár og þekki hvern og einn einasta leikmann í norska landsliðinu. Mér líður mjög vel hér. En ég er þó enn Íslendingur," sagði hann.

Veigar Páll segir að það ríki mikil stemning í Noregi fyrir landsliðinu. „Ég veit að þeir vilja ekki missa stig hér á heimavelli þegar þeir eru svo nálægt því að geta tryggt sér sæti í úrslitakeppni EM. Þeir vilja ekki fara til Danmerkur með þá pressu að þurfa nauðsynlega að vinna þann leik. Það er því mikil spenna fyrir þessum leik hér í Noregi."

Þó svo að mikill munur sé á liðunum tveimur á styrkleikalista FIFA reiknar Veigar Páll ekki með því að Norðmenn muni vanmeta íslenska liðið.

„Sérstaklega þegar mið er tekið af síðustu þremur leikjum okkar því Norðmenn hafa lent í basli með okkur. Ég veit að þeir eru hræddir við okkur og vita að þessi 112 sæti sem eru á milli liðanna á FIFA-listanum gefa rétta mynd af stöðu þeirra."

„Við höfum þar að auki engu að tapa og getur það virkað vel á leikmenn - þeir geta því mætt nokkuð afslappaðir til leiks og leyft sér hluti sem þeir gera annars ekki þegar það er pressa á þeim."