Andorra fékk ekki leyfi hjá UEFA til að spila við Íra í Barcelona

UEFA hefur bannað Andorramönnum að flytja heimaleik sinn á móti Írlandi í undankeppni EM niður til Barcelona-borgar sem er í tveggja tíma fjarlægð frá smáríkinu í Pýreneafjöllum. Írar og Andorramenn vildu færa leikinn vegna mikils áhuga á honum meðal stuðningsmanna írska landsliðsins.

Leikurinn fer fram 7. október og verður því spilaður á Estadi Comunal d'Aixovall í Andorra la Vella, höfuðborg Andorra. Völlurinn tekur aðeins 1800 manns og er stærsti völlurinn í Andorra. Það komu aðeins 200 á síðasta heimaleik Andorra þegar liðið tapaði 0-1 á móti Slóvakíu.

Írar eru á toppi B-riðils á betri markatölu en Rússland og Slóvakía en allar þjóðirnar þrjár hafa 13 stig í 6 leikjum. Áður en að leiknum við Andorra kemur þá eiga Írar eftir að taka á móti Slóvökum  og heimsækja Rússa.

Þetta góða gengi írska landsliðsins hefur vakið upp mikinn áhuga á liðinu heima fyrir en 40 þúsund manns hafa komið að meðaltali á heimaleiki liðsins í undankeppni EM.