Carvalho stakk af úr æfingabúðum portúgalska landsliðsins

Ricardo Carvalho, miðvörður Real Madrid, verður ekki með portúgalska landsliðinu á móti Kýður í undankeppni EM á föstudaginn. Carvalho yfirgaf herbúðir landsliðsins í leyfisleysi og hefur nú verið settur út úr hópnum.

Carvalho fékk ekki leyfi frá forráðamönnum landsliðsins eða frá landsliðsþjálfaranum Paulo Bento en það kemur ekki fram í fréttaskeytum hvert Carvalho fór eða af hverju hann þurfti svona mikið að stinga af í miðjum undirbúningi liðsins fyrir Kýpurleikinn.

„Vegna þessa mun leikmaðurinn ekki ferðast með liðinu til Nicosia," stóð einungis í fréttatilkynningu frá portúgalska sambandinu.

Ricardo Carvalho hefur leikið 71 landsleik og hefur verið fastamaður í miðri vörninni. Pepe, liðsfélagi hans hjá Real Madrid, mun líklega koma inn í byrjunarliðið í staðinn fyrir hann.

Portúgal er með Íslandi í riðli og er í hörku baráttu við Noreg og Danmörk um sæti í úrslitakeppni EM á næsta ári. Allar þjóðirnar eru með tíu stig eftir fimm leiki en Portúgal er með hagstæðasta markatölu og því á toppnum í riðlinum.