Hangeland um Eið Smára: Er ennþá einstaklega hæfileikaríkur

Brede Hangeland, fyrirliði norska landsliðsins, sparaði ekki hrósið á Eið Smára Guðjohnsen á blaðamannafundi fyrir leik Noregs og Íslands í undankeppni EM sem fer fram í Osló á föstudagskvöldið. Hangeland og Eiður Smári spiluðu saman í sex mánuði með Fulham á síðasta tímabili.

„Ég veit að hann er orðinn 32 ára gamall en ég segi samt að hann sé ennþá einstaklega hæfileikaríkur leikmaður. Hann er þannig leikmaður sem getur nýtt hæfileika sína allan sinn feril," sagði Brede Hangeland.

Brede Hangeland talaði líka um Kolbein Sigþórsson sem hefur skoraði fjögur mörk í fyrstu fjórum leikjum sínum með Ajax í hollensku deildinni.

„Þeir eru líka með annan sterkan framherja, heitir hann ekki Sigþórsson? Hann skorar reglulega fyrir Ajax og það segir okkur mikið um hans hæfileika. Svo eru líka nokkrir aðrir ungir leikmenn sem eru að koma upp," sagði Brede Hangeland og nefndi þá Jóhann Berg Guðmundsson og Gylfa Þór Sigurðsson en sá síðarnefndi er meiddur og verður ekki með á móti Noregi.