Eggert hafði betur gegn Guðlaugi í Edinborgarslagnum

Hearts vann í dag 2-0 sigur á Hibernian í grannaslag í skosku úrvalsdeildinni. Eggert Gunnþór Jónsson kom inn á sem varamaður í liði Hearts í seinni hálfleik en Guðlaugur Victor Pálsson, leikmaður Hibs, kom ekki við sögu.

Guðlaugur Victor hefur verið fastamaður í liði Hibs í upphafi tímabilsins en var heldur óvænt settur á bekkinn í dag.

Eggert var sömuleiðis fastamaður í liði Hearts en hefur ekki verið í byrjunarliðinu í síðustu tveimur deildarleikjum liðsins.

Hearts er í fjórða sæti deildarinnar með átta stig en Hibernian er á botninum með þrjú stig. Þetta var þriðji tapleikur liðsins í röð.