Barnaníð í Eyjum: Aðalmeðferð í dag

16. ágúst 2011 11:39

Athæfið átti sér stað í Vestmannaeyjum. MYND/Óskar P. Friðriksson

Aðalmeðferð fer fram í dag við Héraðsdóm Suðurlands í máli manns á fimmtugsaldri sem sakaður er um að hafa misnotað stúlkubarn svo mánuðum skipti í Vestmannaeyjum. Athæfið átti sér stað síðari hluta árs 2009 og fyrri hluta ársins 2010 og í fórum mannsins fannst fjöldi ljósmynda og hreyfimynda sem hann hafði meðal annars tekið af sér og barninu.

Telpan var átta og níu ára þegar ofbeldið stóð yfir. Hörð gagnrýni kom fram við meðferð málsins í garð lögreglustjórans á Selfossi fyrir að krefjast ekki strax gæsluvarðhalds yfir manninum. Hinn meinti barnaníðingur gekk því laus í um það bil ár eftir að málið kom til lögreglu. Saksóknari fór síðan fram á að maðurinn yrði úrskurðaður í gæsluvarðhald þegar málið kom til embættisins í júní og hefur hann setið á bak við lás og slá síðan.

Tengdar fréttir

Afar fátítt að gæsluvarðhalds sé krafist

Helgi Gunnlaugsson, afbrotafræðingur við Háskóla Íslands, segir það ekki nýtt af nálinni að meintir kynferðisbrotamenn séu ekki settir í gæsluvarðhald eftir að kæra hefur verið lögð fram. Fjöldann sé hægt að telja á fingrum annarrar handar af tugum eða hundruðum mála.

2. júlí 2011 09:30

Barnaníð í Eyjum: Mannlegur harmleikur, segir bæjarstjórinn

Bæjarstjórinn í Vestmannaeyjum segir mál barnaníðingsins, sem nauðgaði dóttur sinni og er grunaður um brot gegn fleiri börnum, mannlegan harmleik sem tengist bæjarfélaginu ekki á nokkurn máta.

30. júní 2011 12:15

Gæsluvarðhald yfir meintum barnaníðingi staðfest

Hæstiréttur staðfesti í dag gæsluvarðhaldsúrskurð héraðsdóms yfir meintum barnaníðingi í Vestmannaeyjum. Maðurinn er á fimmtugsaldri og telur saksóknari rökstuddan grun um að hann hafi níðst kynferðislega á stúlkubarni svo mánuðum skipti.

29. júní 2011 14:49

Barnaníð í Eyjum: Maðurinn átti að sæta gæsluvarðhaldi

Bæjarstjórinn í Vestmanneyjum gerir alvarlegar athugasemdir við að maður sem nauðgaði dóttur sinni og er grunaður um brot gegn fleiri börnum hafi ekki verið úrskurðaður í gæsluvarðhald eftir að málið kom upp. Hann segir sýslumanninn á Selfossi hafa verið gerðan að blóraböggli í málinu. Ekki megi vanmeta aðstæður og hlut kerfisins í málum sem þessum. Bæjarstjórinn gagnrýnir aðferðafræði stjórnsýslunar að flytja ákvörðunartökuna ætíð frá fólki í héraði.

1. júlí 2011 18:20

Barnaníð í Eyjum: Kallar eftir greinargerð um meðferð málsins

Innanríkisráðuneytið hefur sent ríkissaksóknara bréf þar sem óskað er eftir greinargerð um meðferð embættis ríkissaksóknara og lögreglustjórans á Selfossi á kynferðisbrotamáli sem upp kom í Vestmannaeyjum.

1. júlí 2011 14:31

Staðfestir að óformleg samskipti áttu sér stað

Sigríður J. Friðjónsdóttir, ríkissaksóknari, staðfestir að óformleg samskipti hafi átt sér stað á milli embættisins og lögreglu við rannsókn á barnaníði í Vestmannaeyjum. Hún tekur þó fram að ríkissaksóknari hafi ekki haft áhrif á endanlega ákvarðanatöku sýslumannsins á Selfossi varðandi gæsluvarðhald, enda ekki með málsgögn undir höndum. Það er í samræmi við yfirlýsingu Ólafs Helga Kjartanssonar sem hann sendi frá sér í gær vegna málsins og tekur þar fulla ábyrgð á þeirri ákvörðun að krefjast ekki gæsluvarðhalds yfir manninum sem nú er til rannsóknar eftir að myndir og myndbönd af honum að nauðga stjúpdóttur sinni komust í hendur lögreglu. „Settur saksóknari kaus að lýsa því, við flutning kröfunnar fyrir Héraðsdómi Suðurlands, sem mistökum Lögreglustjórans á Selfossi að hafa ekki gert kröfu um gæslu yfir meintum geranda. Þetta gerir saksóknarinn vitandi vits að óformleg samskipti höfðu farið fram milli embættanna um mögulega gæsluvarðhaldskröfu bæði við upphaf máls, þegar upplýsingar um myndefnið lágu fyrir og við ábendingar barnaverndarnefndar Vestmanneyja í mars s.l. Niðurstaða þeirra samskipta var samdóma álit um að ekki skyldi krefjast gæsluvarðhalds. Ábyrgðin á þeirri ákvörðun er hinsvegar lögreglustjórans."

30. júní 2011 13:30