Roma búið að kaupa hollenska landsliðsmarkvörðinn frá Ajax

Maarten Stekelenburg, markvörður Ajax og hollenska landsliðsins, mun spila í ítölsku deildinni á komandi tímabil eftir að Roma keypti hann í gær frá Ajax.

„Ajax og Roma hafa komist að samkomulagi um kaup á Maarten Stekelenburg," sagði Ajax á heimasíðu sinni í gær en með Ajax spilar einmitt íslenski framherjinn Kolbeinn Sigþórsson.

Stekelenburg er 29 ára gamall og hefur verið hjá Ajax síðan 2002. Hann hefur þrisvar orðið hollenskur meistari og þrisvar orðið bikarmeistari með Ajax á þessum níu árum. Stekelenburg er aðalmarkvörður Hollands og á að baki 40 landsleiki.

Stekelenburg kemur í stað brasilíska markvarðarins Doni sem Roma seldi til Liverpool á dögunum. Roma er líka búið að fá til sína tvo unga sóknarmenn, Bojan Krkic frá Barcelona og Erik Lamela frá River Plate sem þykir einn sá efnilegasti í Argentínu.