Adam og Eva enn í Eden

Þrátt fyrir að Eden sé nú brunarústir einar, virðast Adam og Eva ekki hafa hug á að yfirgefa aldingarðin sjálfviljug.

Eldurinn náði að leggja undir sig allt húsið á innan við hálftíma og át í sig allt sem á vegi hans varð. Það virðist hinsvegar hafa verið honum ofviða að læsa klóm sínum í viðarhurðina á framhlið hússins, en hana prýða útskornar myndir af Adam og Evu.

Tilkynning um reyk frá húsinu barst rétt upp úr miðnætti og var allt lið Brunavarna Suðurlands kallað út auk þess sem liðsauki var sendur af stað frá höfuðborgarsvæðinu. Það varð þó fljótlega ljóst að eldurinn væri óviðráðanlegur og var liðsaukinn því afturkallaður.

Húsið var mannlaust og engan sakaði í eldsvoðanum, ekki einusinni Adam og Evu, sem neituðu að yfirgefa paradís þó svo hún stæði í ljósum logum.