Markvörður rekinn eftir einn leik

Brasilíumaðurinn Rodrigo Galatto, markvörður Neuchatel Xamax í svissnesku knattspyrnunni, var rekinn eftir aðeins einn leik á milli stanganna hjá félaginu. Mikið hefur gengið á hjá svissneska félaginu síðan Tsjetsjeninn Bulat Chagaev keypti félagið í maí.

Chagaev hefur ráðið ríkjum hjá Xamax í um tvo mánuði. Tveir þjálfarar hafa fengið að taka pokann sinn, öllu skrifstofufólkinu verið sagt upp auk þess sem samningum við alla styrktaraðila félagsins hefur verið rift.

Neuchatel Xamax beið lægri hlut gegn Lucerne 3-0 í svissnesku deildinni um helgina og þótti frammistaða Galatto ekki upp á marga fiska.

„Rodrigo Galatto er ekki hluti af liðinu lengur," sagði Sonny Anderson úr þjálfarateymi félagsins og landi Galatto.

Félagið þurfti að handskrifa miðana á leik liðsins gegn Lucerne þar sem félagið hafði ekki tök á því að prenta miðana í tíma eftir endurskipulagninguna á skrifstofu félagsins.

Galatto varð frægur á einni nóttu í heimalandi sínu fyrir frammistöðu sína í leik með Gremio árið 2005. Þá tókst Gremio að sigra Nautico 1-0 þrátt fyrir að fjórum leikmönnum liðisins hefði verið vikið af velli. Galatto varði meðal annars vítaspyrnu í leiknum.

Leikurinn var hreinn úrslitaleikur liðanna um sæti í efstu deild brasilískrar knattspyrnu.

Myndband úr leiknum má sjá í spilaranum hér að ofan.