Eiður fékk ekki að vera númer 22 í fyrsta leiknum - markalaust hjá AEK

Eiður Smári Guðjohnsen spilaði sinn fyrsta leik fyrir AEK í kvöld þegar liðið gerði markalaust jafntefli við tyrkneska liðið Karabükspor í æfingaleik. Eiður Smári lék aðeins fyrri hálfleikinn og var einu sinni nálægt því að skora.

Eiður Smári fékk ekki að spila í treyju númer 22 í leiknum, eins og honum var úthlutað í síðustu viku, en var þess í stað í peysu númer 16. Kamerúnmaðurinn Steve Leo Beleck kom inn á fyrir Eið Smára í hálfleik.  

Eiður Smári var ekki eini íslenski leikmaðurinn sem spilaði í leiknum því Elfar Freyr Helgason kom inn á sem varamaður á 58. mínútu.