Dregið í riðla í undankeppni HM 2014 á laugardag

Á laugardaginn verður dregið í riðla í undankeppni heimsmeistaramótsins í Brasilíu árið 2014. Ísland er í neðsta styrkleikaflokknum af sex.

Drátturinn fer fram í Ríó de Janeiro í Brasilíu og hefst klukkan 18 að íslenskum tíma. Dregið verður í níu riðla, átta þeirra verða sex liða riðlar en sá síðasti fimm liða riðill. Þar sem Ísland er í sjötta styrkleikaflokki er ljóst að liðið verður í sex liða riðli.

Styrkleikaflokkana má sjá hér.

Íslenska landsliðið hefur í síðustu undankeppnum stórmóta lent í fimm liða riðli. Af þeim sökum hefur landsliðið verið lægst skrifað af liðunum í riðlinum og ekki fengið leiki gegn lakari þjóðum. Til þess að vinna sig upp á styrkleikalista FIFA skiptir miklu máli að vinna leiki í keppnum sama hver andstæðingurinn er.

Evrópa fær þrettán sæti í lokakeppninni í Brasilíu. Efsta liðið í hverjum riðli í undankeppninni fer beint í aðalkeppnina en liðin átta með besta árangur í öðru sæti fara í tveggja leikja umspil um fjögur laus sæti í lokakeppninni.