Átta ára fótboltagutti með snilldartakta - nýr Messi?

Tomy Angel, átta ára gamall fótboltastrákur í Los Angeles í Bandaríkjunum, hefur vakið athygli á undanförnum mánuðum fyrir færni sína og hæfileika. Máltækið; sjaldan fellur eplið langt frá eikinni á vel við við um Tomy því faðir hans er Kólumbíumaðurinn Juan Pablo Angel, fyrrum framherji enska úrvalsdeildarliðsins Aston Villa.

Myndband þar sem búið er að klippa saman bestu tilþrifin hjá þessum unga fótboltamanni hefur vakið athygli og margir sérfræðingar sjá svipaða takta í Tomy og Lionel Messi. Tomy er lágvaxinn, snar í snúningum, með auga fyrir samspili og kann að skjóta á markið – og hann er örvfættur

Myndbandið má sjá með því að smella hér.

Angel fjölskyldan býr í Los Angeles en Juan Pablo hefur leikið með David Beckham í LA Galaxy í MLS deildinni að undanförnu. Angel skoraði 20 mörk fyrir Aston Villa veturinn 2004-2004 og frá þeim tíma hefur enginn framherji liðsins náð að skora yfir 20 mörk á einu tímabili í ensku úrvalsdeildinni.