Jurgen Klinsmann ráðinn þjálfari bandaríska landsliðsins

Þjóðverjinn Jurgen Klinsmann var í dag ráðinn þjálfari bandaríska landsliðsins í fótbolta og mun taka við stöðu Bob Bradley sem var rekinn í gær. Klinsmann hefur verið orðaður við bandaríska landsliðið frá árinu 2006 en skrifaði undir samning í dag.

Fyrsti leikur landsliðsins undir stjórn Klinsmann verður á móti Mexíkó í vináttulandsleik í Philadelphiu 10. ágúst næstkomandi en framundan er síðan undankeppni HM 2014.

Klinsmann er orðinn 47 ára gamall og hefur verið búsettur í Bandaríkjunum síðan að hann lagði knattspyrnuskóna á hilluna 1998.  Klinsmann þjálfaði þýska landsliðið frá 2004 til 2006 en síðasta starf hans var með Bayern Munchen frá 2008 til 2009.