Tveir nýir sigkatlar komu í ljós. Mynd/ Oddur Sigurðsson.
Líkur eru taldar á að lítið eldgos hafi orsakað hlaupið undan vestanverðum Vatnajökli í gær, að sögn Odds Sigurðssonar jarðfræðings. Tveir nýir sigkatlar, sem ekki var vitað um áður, komu í ljós í flugi almannavarna yfir svæðið í gærkvöldi.
Flóðbylgjan, sem braust fram undan vestanverðum Vatnajökli í fyrrinótt, og fór niður í Hágöngulón, Köldukvísl og Þórisvatn, virðist hafa átt upptök sín á svæði skammt austan Hamarsins í vesturjaðri jökulsins. Oddur segir að þar hafi myndast tveir sigkatlar, á stað þar sem ekki var vitað um jarðhita áður. Annar sé hringlaga og þröngur en hinn breiðari og aflangur. Þeir séu þó miklu minni en Skaftárkatlarnir, sem Skaftá hlaupi úr.
Sigkatlarnir sjást greinilega. Mynd/ Oddur Sigurðsson.Oddur telur að kvika hafi hugsanlega brotist upp til yfirborðs í fyrradag. Þarna sé greinilega hiti undir jöklinum á stað þar sem ósennilegt er að hafi verið hiti áður. Örlítil gusa af jarðefnum kunni að hafa komið upp. Oddur segir að ef þarna hafi gosið þá hafi það staðið stutt yfir. Það hafi þá verið augnabliksfyrirbrigði. Efnagreiningar muni þó væntanlega gefa vísbendingar um hvort þarna hafi gosið.
Spurður hvort búast megi við frekari atburðum þarna svarar Oddur að hann hafi alltaf átt von á að þarna kæmi eitthvað upp. Allur vestanverður Vatnajökull sé hávirkt svæði og nálægt miðju heita reitsins svokallaða, eldvirkasta svæðis landsins.
Hlaupið sem kom úr vestanverðum Vatnajökli reyndist gríðarstórt og fór vatnsrennslið yfir tvöþúsund rúmmetra á sekúndu í nótt, sem er meira en í stærstu Skaftárhlaupum. Líklegast þykir að hlaupið komi úr jarðhitakatli undir jöklinum. Vísindamenn telja ekki bein tengsl milli þessa atburðar og hlaupsins úr Kötlu um síðustu helgi.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
