Chile vann Mexíkó - Jafnt hjá Úrúgvæ

Tveir leikir fóru fram í Suður-Ameríku bikarnum í knattspyrnu í gærkvöldi. Chile vann sigur á Mexíkó 2-1 eftir að hafa lent marki undir en Úrúgvæ náði aðeins jafntefli 1-1 gegn Perú.

Chile lenti undir í fyrri hálfleik gegn gangi leiksins. Nestor Araújo skoraði þá með skalla og kom gestaþjóðinni Mexíkó yfir. Chile tókst að jafna metin um miðjan síðari hálfleik þegar varamaðurinn Esteban Parades skoraði af stuttu færi.

Sigurmark Chile kom á 73. mínútu þegar Arturo Vidal skoraði með hörkuskalla eftir hornspyrnu. Stuðningsmenn Chile fögnuðu vel og innilega í stúkunni. Hafa skal í huga að lið Mexíkó er nokkuð vængbrotið en átta leikmenn liðsins voru settir út úr hópnum vegna agabrota skömmu fyrir mótið.

Í fyrri leik gærkvöldsins gerðu Diego Forlán og félagar frá Úrúgvæ 1-1 jafntefli gegn Perú. Perúmenn komust yfir um miðjan fyrri hálfleik með marki Paolo Guerrero sem slapp einn í gegn og kláraði færið vel.

Úrúgvæar reyndu hvað þeir gátu að jafna og það var Luis Suárez leikmaður Liverpool sem skoraði markið dýrmæta í uppbótartíma í fyrri hálfleik. Forlan fékk besta færi Úrúgvæ í síðari hálfleik til þess að tryggja sínu liði þrjú stig en skot hans fór yfir.

Minnstu munaði að Juan Manuel Vargas framherji Fiorentina stæli sigrinum fyrir Perú í blálokin en skalli hans fór hárfínt framhjá.

Úrslitin koma töluvert á óvart. Úrúgvæ komst í undanúrslit á HM 2010 og með margar sóknarþenkjandi stórstjörnur innanborðs. Perú lenti hins vegar í neðsta sæti í sínum riðli í undankeppni þess móts.

Argentínu, Brasilíu og nú Úrúgvæ hefur öllum mistekist að ná í þrjú stig gegn veikari andstæðingum í fyrsta leik sínum. Liðin þrjú þóttu sterkust fyrir mótið og var af þeim sökuð raðað hverju í sinn riðilinn.

Markaþurrð hefur verið í keppninni fram til þessa en leikir gærkvöldsins voru stórskemmtilegir. Næsti leikur keppninnar er annað kvöld þegar heimamenn í Argentínu mæta Kólumbíu.