Kolbeinn vanur því að skora gegn Hvít-Rússum

Kolbeinn Sigþórsson verður vonandi á markaskónum í dag en hann hefur áður sýnt hvers hann er megnugur gegn liðum frá Hvíta-Rússlandi.

Ísland mætir Hvít-Rússum í fyrsta leik EM U-21 liða hér í Árósum í dag klukkan 16.00.

Kolbeinn skoraði mikið með liði sínum, AZ Alkmaar, í vetur og þar af þrjú mörk gegn BATE Borisov frá Hvíta-Rússlandi í Evrópudeild UEFA.

Hann skoraði eina mark sinna manna í AZ þegar að liðið tapaði, 4-1, fyrir BATE í Hvíta-Rússlandi en svo tvö mörk í 3-0 sigri AZ á heimavelli.

Kolbeinn veiktist fyrr í vikunni en náði fljótt bata og æfði með liðinu í gær. Hann ætti því að geta verið með í byrjunarliðinu í dag.

Alls eru fimm leikmenn frá BATE í liði Hvíta-Rússlands í dag.