Arnór: Betra að spila fyrir fullum velli

Arnór Smárason segir að danska liðið sé vel spilandi og með góða leikmenn sem þurfi að hafa gætur á. Hann segir þó að Íslendingar muni mæta dýrvitlausir til leiks.

Ísland mætir Dönum hér í Álaborg í kvöld í lokaumferð riðlakeppninnar. Þrátt fyrir að hafa tapað fyrstu tveimur leikjum sínum á mótinu á Ísland enn möguleika að komast áfram - vinni strákarnir Dani með því að skora minnst fjögur mörk og vinna með minnst þriggja marka mun auk þess sem þeir verða að treysta á að Sviss vinni Hvíta-Rússland.

Arnór Smárason var á blaðamannafundi íslenska liðsins í gær og var spurður út í styrkleika danska liðsins.

„Þeir eru með sókndjarfa bakverði og kantmenn og það fer mikið af þeirra spili í gegnum þá," sagði Arnór. „Christian Eriksen er svo eins og allir vita mjög góður leikmaður og þurfum við að hafa gætur á honum."

„En ég held að það sem skipti fyrst og fremst máli er hversu hungraðir við erum. Við viljum gera miklu betur en viðhöfum sýnt hingað til. Ég held að við munum sjá dýrvitlausa íslenska leikmenn í leiknum."

Arnór leikur með danska liðinu Esbjerg og segir að það geti myndast góð stemning þegar Dani fjölmenni á völlinn. „Það má búast við miklu fjöri og fullum velli af áhorfendum enda þurfa Danir líka að vinna leikinn. Það er alltaf mikil og góð stemning í kringum danska leikmenn - þeir fá sér pylsu og öllara og eru skemmtilegir. Ég hlakka mikið til leiksins."

Hann segir betra að spila fyrir fullum velli, þó svo að flestir séu á bandi andstæðingsins. „Það er alltaf skemmtilegast að spila fyrir sem flesta," sagði Arnór sem hefur sjálfur spilað tvívegis á Álaborgarvelli með sínu félagsliði - og unnið í bæði skiptin.