Haraldur: Hlusta ekki á gagnrýni annarra

Haraldur Björnsson átti stórleik í marki íslenska liðsins gegn Danmörku í gær og ljóst að hann vakti athygli marga af þeim fjölmörgu útsendurum erlendu liða sem voru á vellinum í gær.

Ísland vann leikinn, 3-1, og það var ekki síst fyrir frammistöðu Haraldar að Danir skoruðu aðeins þetta eina mark í leiknum. 3-0 sigur hefði þó dugað Íslandi til að komast áfram í riðlinum en það var ekki við Harald að sakast.

„Við vorum grátlega nálægt því að komast áfram. Þó að við tókum nokkra bolta stöngina inn þá voru líka nokkrir boltar stöngin út. En við sýndum með þessum leik að við getum labbað stoltir frá þessari keppni,“ sagði Haraldur sem varði oft stórglæsilega í leiknum.

„Hvernig er annað hægt en að mæta til leiks fullur sjálfstraust í svona leik og á svona velli? Þó að maður hafi verið á nálum yfir því hvað völlurinn og boltinn var blautur þá lætur maður það vinna með sér - það gerir mann enn einbeittari.“

„Skiptir engu þó svo að áhorfendur séu að baula á mann og kasta ýmsu lauslegu í mig. Maður heldur bara einbeitingunni.“

Því verður ekki neitað að margir höfðu helst áhyggjur af því að markvarslan yrði helsta vandamál íslenska liðsins - enda hafi liðið fengið á sig mörk í flestum leikjum undankeppninnar, rétt eins og var reyndar tilfellið nú í Danmörku.

„Ég hef ekki verið mikið að hlusta á aðra þegar ég er að einbeita mér að minni markvörslu. Ég hlusta á mína þjálfara og þá sem leiðbeina mér bæði í landsliðinu og hjá Val. Það er allt mjög gott fólk sem hefur unnið með mér - allt vinnur þetta saman.“