Þjóðverjar ætla að loka öllum kjarnorkuverum sínum

Ríkisstjónin í Þýskalandi hefur ákveðið að slökkva á öllum kjarnorkuverum sínum á næsta áratug. Þetta var ákveðið á fundi stjórnarinnar sem hófst í gær og stóð langt fram á nótt. Mikil umræða hefur verið í landinu um kjarnorkumál í kjölfar slyssins í Fukushima kjarnorkuverinu í Japan og mótmæltu þúsundir manna kjarnorkunni víða um land.

Umhverfisráðherrann Norbert Rottgen sagði á blaðamannafundi eftir að ákvörðunin var tekin að sjö gömul kjarnorkuver sem þegar hefur verið slökkt á tímabundið muni aldrei komast aftur í gagnið. Sex öðrum verum verður lokað fyrir árið 2021 og þrjú nýjustu kjarnorkuver landsins munu hætta starfsemi árið 2022.

Áður en slökkt var tímabundið á gömlu verunum í mars síðastliðinn komu 23 prósent af allri orku sem notuð er í Þýskalandi frá kjarnorkuverum og hafa talsmenn kjarnorkunnar í landinu varað við því að lokanirnar muni hafa neikvæð áhrif á þýskan iðnað í heild sinni.