Wilshere ekki með Englandi á EM í sumar

Jack Wilshere, leikmaður Arsenal, mun ekki spila með Englandi í úrslitakeppni EM U-21 liða í Danmörku í sumar. Stuart Pearce, landsliðsþjálfari, hefur tilkynnt 23 manna lokahóp sinn.

Andy Carroll, leikmaður Liverpool, er ekki heldur með í hópnum en það er vegna meiðsla. Pearce vildi fá alla sína bestu menn með á mótið en verður ekki af ósk sinni.

Wilshere sagði margoft í vetur að hann vildi spila með Englandi í sumar þrátt fyrir að Arsene Wenger, stjóri hans hjá Arsenal, hafi verið mjög svo andsnúinn því.

„Ég ræddi við Jack í síðustu viku," sagði Pearce við enska fjölmiðla. „Hann sagði mér fyrst í mars að hann vildi vera með en núna finnst honum að hann sé ekki í besta forminu til að taka þátt."

„Það er vegna þess hversu marga leiki hann hefur spilað með Arsenal á tímabilinu. Hann hefur því áhyggjur af hvaða áhrif það gæti haft á þátttöku hans á næsta tímabili ef hann spilar með U-21 liðinu nú."

„Jack hefur alltaf notið þess að spila með U-21 liðinu. Þetta eru mikil vonbrigði að fá hann ekki með en ég hef sætt mig við þessa niðurstöðu," sagði Pearce.

Meðal þeirra leikmanna sem munu spila með Englendingum í sumar eru Chris Smalling, Daniel Sturridge, Micah Richards, Jordan Henderson og Danny Welbeck. Átján af leikmönnunum 23 eru á mála hjá félögum í ensku úrvalsdeildinni.

England leikur í B-riðli ásamt Spáni, Úkraínu og Tékklandi. Ísland er í A-riðli með Danmörku, Hvíta-Rússlandi og Sviss.

Leikmannahópur U21-liðs EnglandsMarkverðir:

Frankie Fielding (Derby County)

Jason Steele (Middlesbrough)

Alex McCarthy (Reading)

Varnarmenn:

Ryan Bertrand (Chelsea)

Kieran Gibbs (Arsenal)

Phil Jones (Blackburn Rovers)

Michael Mancienne (Chelsea)

Micah Richards (Manchester City)

Chris Smalling (Manchester United)

Kyle Walker (Tottenham Hotspur)

Miðvallarleikmenn:

Marc Albrighton (Aston Villa)

Tom Cleverley (Manchester United)

Jack Cork (Chelsea)

Jordan Henderson (Sunderland)

Henri Lansbury (Arsenal)

Fabrice Muamba (Bolton Wanderers)

Jack Rodwell (Everton)

Danny Rose (Tottenham Hotspur)

Scott Sinclair (Swansea City)

Sóknarmenn:

Nathan Delfouneso (Aston Villa)

Daniel Sturridge (Chelsea)

Danny Welbeck (Manchester United)

Connor Wickham (Ipswich Town)