Chris Coleman tekur við Larissa í Grikklandi

Chris Coleman, fyrrum knattspyrnustjóri Fulham, samdi í dag við gríska liðið Larissa sem KR sló úr leik í forkeppni Evrópudeildar UEFA fyrir tveimur árum.

KR vann þá samanlagðan 3-1 sigur en féll svo úr leik þegar að liðið mætti Basel frá Sviss í næstu umferð.

Coleman fær nú það verkefni að koma Larissa aftur í fremstu röð í Grikklandi en liðið féll úr grísku úrvalsdeildinni í síðasta mánuði.

Hann skrifaði undir eins árs samning við félagið en ef vel gengur er möguleiki á að samningurinn verði framlengdur um tvö ár.

Þetta er ekki í fyrsta sinn sem Coleman tekur að sér þjálfarastarf utan Bretlandseyja en hann var stjóri spænska liðsins Real Sociedad árið 2007. Hann tók svo við Coventry en var rekinn þaðan fyrir ári síðan eftir slæmt gengi.