Þrír farþegar í sömu vél unnu bíl í skafmiðaleik

Lággjaldaflugfélagið Ryanair hefur hafið rannsókn á því hvernig það gat gerst að þrír farþegar um borð í sömu vélinni á leið til Madríd unnu stærsta vinninginn í skafmiðahappdrætti félagsins.

Allir duttu þeir í lukkupottinn og unnu bíl sem metinn er á rúmar tvær milljónir króna. Flugfélagið grunar hinsvegar að um prentvillur hafi verið að ræða enda er gert ráð fyrir því að einn bíll renni út í hverjum mánuði að meðaltali í happdrættinu sem flugfélagið hefur staðið fyrir í þrjú ár.

Farþegunum þremur stendur væntanlega hjartanlega á sama um allt slíkt tal og búast væntanlega við því að geta tekið við lyklunum á næstu dögum.