Pabbinn dæmdur fyrir árás á móður drengsins

Móðir sjö ára drengs, sem talið er að hafi verið gróflega misnotaður af föður sínum og frænda, hefur þurft að flýja heimili sitt með drenginn vegna hótana frá mönnunum tveimur. Faðirinn hefur hlotið dóm fyrir ofbeldi sem hann beitti móður drengsins og föður hennar.

Faðir drengsins er um fimmtugt og á að baki langan sakaferil. Samkvæmt sakavottorði hefur hann hlotið samtals níu dóma meðal annars fyrir þjófnaði, líkamsárásir, fjársvik, hilmingu og fíkniefnalagabrot.

Fyrir um fjórum árum var hann svo sakfelldur fyrir að hafa misþyrmt móður drengsins og föður hennar auk þess sem hann skemmdi bíl þeirra. Með þessum brotum rauf hann einnig skilorð.

Frændi drengsins sem er á fertugsaldri er einnig grunaður um að hafa beitt drenginn kynferðislegu ofbeldi en ekki er vitað til þess að hann hafi áður komið við sögu lögreglu. Misnotkunin mun hafa staðið yfir í einhvern tíma og munu brotin hafa verið gróf.

Samkvæmt heimildum fréttastofu hafa móðir drengsins og stjúpi þurft að flýja heimili sitt með drenginn og börn sem þau eiga saman vegna grófra hótana frá mönnunum tveimur.

Mennirnir voru handteknir eftir ábendingu frá barnaverndaryfirvöldum í Kópavogi og hafa verið úrskurðaðir í gæsluvarðhald þar til á morgun. Samkvæmt lögreglunni á höfuðborgarsvæðinu hefur ekki verið tekin ákvörðun um hvort farið verður fram á frekara gæsluvarðhald yfir mönnunum.

Að sögn Björgvins Björgvinssonar, yfirmanns kynferðisbrotadeildar lögreglunnar á höfuðborgarsvæðinu, var húsleit gerð hjá mönnunum 31. mars og hald lagt á tölvubúnað mannanna. Verið er að fara yfir gögnin í tölvunum núna er grunur leikur á að mennirnir hafi myndað kynferðislegt ofbeldi sem þeir beittu drenginn.

Í Fréttablaðinu í dag er fjallað um málið og kemur þar fram að á heimilum mannanna fundust fíkniefni, bæði maríjúana og hvítt efni sem talið er vera kókaín.