Ákvörðun um gæsluvarðhald yfir grunuðum níðingum tekin á morgun

Ákvörðun um að óska eftir áframhaldandi gæsluvarðhaldi yfir mönnunum tveimur sem grunaðir eru um að hafa beitt átta ára gamlan son annars þeirra grófu kynferðislegu ofbeldi verður tekin á morgun.

Mennirnir voru handteknir síðastliðinn fimmtudag og úrskurðaðir í gæsluvarðhald sem rennur út á morgun. Friðrik Smári Björgvinsson yfirlögregluþjónn hjá lögreglunni á höfuðborgarsvæðinu segir að ekki sé búið að ákveða hvort farið verði fram á frekara gæsluvarðhald yfir mönnunum, sú ákvörðun verði tekin á morgun áður en gæsluvarðhaldið renni út.

Fréttablaðið greindi frá málinu í morgun en mennirnir eru á fertugsaldri og um fimmtugt. Málið barst til lögreglu frá Barnaverndarnefnd Kópavogs og við húsleitir heima hjá þeim fundust fíkniefni auk þess sem hald var lagt á tölvur beggja. Grunur leikur á að misnotkunin hafi staðið í nokkurn tíma og að brotin hafi verið mjög gróf að því er fram kemur í blaðinu.

Móðir drengsins hefur þurft að flýja með drenginn af heimilinu ásamt núverandi sambýlismanni, vegna ítrekaðra hótana frá mönnunum tveimur.