Menn Gaddafis vinna á - stefna á Benghazi

Hermenn hliðhollir Gaddafi einræðisherra í Líbíu hafa síðustu daga unnið á gegn uppreisnarmönnum í austurhluta landsins og segja fréttamenn á staðnum að borgin Zawya vestur af höfuðborginni Trípólí sé nú fallin í hendur þeirra, eftir margra daga loftárásir.

Uppreisnarmennirnir hafa einnig flúið hafnarbæinn Ras Lanuf en báðar borgirnar hafa verið á valdi þeirra síðustu vikur. Sonur Gaddafis, Saif al-Islam, sendi út tilkynningu í gær þar sem hann segir stjórnarhermenn á leið til Benghazi, helsta vígis uppreisnarmanna.