Jón Gnarr í Vín á meðan sameining í skólakerfinu er rædd

Jón Gnarr, borgarstjóri Reykjavíkur, er staddur í Vínarborg í Austurríki þar sem hann er á ráðstefnu að kynna hugmyndina á bak við Besta flokkinn. Vegna þessa er Jón ekki viðstaddur umræður sem nú standa yfir á fundi borgarstjórnar um niðurskurð í menntamálum.

Mikil ólga ríkir meðal fulltrúa minnihlutans vegna fjarveru Jóns en fá mál hafa vakið meiri reiði meðal borgarbúa á undanförnum mánuðum en sá niðurskurður og sameining sem meirihlutinn leggur til hjá leikskólum, grunnskólum og frístundaheimilum borgarinnar.

Fastir fundir borgarstjórnar eru klukkan tvö á þriðjudögum. Í dag er til umræðu aðkoma íbúa og starfsfólks að tillögum um sameiningu leik- og grunnskóla í Reykjavík, skýrslu vinnuhóps, vinnuferli og afgreiðslu málsins. Þessi mál eru á dagskrá fundarins í dag að beiðni borgarfulltrúa Sjálfstæðisflokks og Vinstri grænna.