Bakarí mátti ekki dreifa myndbandi af ungum drengjum

Bæjarbakarí í Hafnarfirði braut gegn persónuverndalögum það birti á vefnum YouTube myndskeið sem talið var sýna ungan dreng taka farsíma ófrjálsri hendi. Þetta er niðurstaða Persónuverndar sem birti úrskurð sinn í dag.

Faðir tveggja drengja, sem eru undir 10 ára aldri, kvartaði til Persónuverndar vegna birtingar á myndbandi úr öryggismyndavél Bæjarbakarís á Netinu. Á umræddu myndbandi virtist annar drengjanna taka farsíma af borði ófrjálsri hendi. Í kvörtuninni segir meðal annars að samkvæmt lögum sé óheimilt að birta öryggis-upptökuefni á veraldarvefnum ef glæpur hefur verið framin. Eingöngu lögreglan hafi leyfi til að birta og nota efni sem tekið hefur verið upp í rannsóknarskyni.

Forsvarsmaður Bæjarbakarís kvaðst hafa staðið í þeirri trú að það væri leyfilegt að setja myndskeiðið á Neitð. Um það bil tveimur klukkustundum eftir að myndbandið fór á vefinn, hafi umboðsmaður barna sett sig í samband við umræddan aðila og bent honum á að slík myndbirting væri ekki æskileg. Rekstrarstjóri bakarísins hafi brugðist við þeirri athugasemd með því að fjarlægja myndbandið tafarlaust af vefnum. Ekki hafi verið um að ræða ásetning af hálfu rekstrarstjóra bakarísins einungis vanþekkingu á gildandi lögum.

Í úrskurði Persónuverndar kemur fram að í tilfelli sem þessu kunni að vera að brotið hafi verið á friðhelgi einstaklinga. Drengirnir hafi verið ósakhæfir og undir fimmtán ára aldir. „Við vinnslu viðkvæmra persónuupplýsinga um svo unga einstaklinga ber að sýna sérstaka varúð og hafa í huga að börn eru hópur sem þarfnast sérstakrar verndar umfram hina fullorðnu,“ segir í úrskurðinum.