Vinsældir forsetans aukast

Flestir bera mikið traust til Ólafs Ragnars Grímssonar, forseta Íslands, ef marka má nýja könnun sem MMR gerði á trausti til stjórnmálamanna. Um 41,7% treysta Ólafi Ragnari og eykst traustið mikið frá síðustu könnun sem gerð var í maí 2010. Þá sögðust um 26,7% treysta honum.

Jafnframt segjast 22,3% bera mikið traust til Steingríms J. Sigfússonar fjármálaráðherra en þeir voru 37,6% í síðustu könnun. Jafnframt kváðust 16,9% bera mikið traust til Jóhönnu Sigurðardóttur forsætisráðherra en 23,9% í síðustu könnun.

Traust til Bjarna Benediktssonar eykst. Nú sögðust 19,1% bera mikið traust til Bjarna en þeir voru 13,8% í síðustu könnun.

Hlutfall þeirra sem segjast bera lítið traust til forseta Íslands hefur líka snarbreyst. Í síðustu könnun sögðust 46,9% aðspurðra bera lítið traust til Ólafs Ragnars en nú voru þeir 25,3%.

Könnunin var gerð dagana 8. til 11. mars síðastliðinn á netinu og í gegnum síma. Svarfjöldi var 902 einstaklingar.