Kópavogur greiðir málskostnað vegna einkamáls

Bæjarráð Kópavogs hefur samþykkt að greiða málskostnað vegna einkamáls þriggja bæjarfulltrúa úr bæjarsjóði. Hópur bæjarbúa hefur ráðið lögfræðing og hyggst kæra málið ef niðurstaðan verður staðfest í bæjarstjórn.

Frjáls miðlun ehf. höfðaði meiðyrðamál á hendur þremur bæjarfulltrúum Kópavogsbæjar vegna greinar sem þeir skrifuðu um viðskipti bæjarins við fyrirtækið. Viðskiptin höfðu farið fram án útboðs, auk þess sem eigendur fyrirtækisins tengdust þáverandi bæjarstjóra, Gunnari I. Birgissyni, fjölskylduböndum. Bæjarfulltrúarnir voru sýknaðir fyrir héraðsdómi, en báru þrátt fyrir það kostnað af málinu umfram þær bætur sem dómurinn ákvað. Í gær var samþykkt tillaga í bæjarráði Kópavogs um að málskostnaður bæjarfulltrúanna verði greiddur úr bæjarsjóði, en þeir greiði upphæðina til baka ef þeir tapi málinu fyrir hæstarétti.

Guðríður Arnardóttir, formaður bæjarráðs og einn bæjarfulltrúanna þriggja, segir að þetta komi til þar sem þeir hafi fallið milli skips og bryggju í kerfinu, en hvorki einkatryggingar þeirra né tryggingar Kópavogsbæjar hafi náð yfir málskostnað vegna starfa þeirra sem kjörinna fulltrúa. Því felst jafnframt í tillögunni að bæjarlögmanni verði falið að leita eftir tilboðum í tryggingar sem tækju á samskonar málum í framtíðinni.

Gunnar I. Birgisson lagði fram bókun á fundi bæjarráðs þar sem hann gaf í skyn að bæjarfulltrúarnir færu með bæjarsjóð eins og banka, en það segir Guðríður ósanngjarna gagnrýni.

„Mér finnst hún mjög ósanngjörn, og enganvegin rétt," segir Guðríður. „Ég held að við þurfum að hugsa þetta í stærra samhengi. Það er gerð sú krafa á kjörna fulltrúa að þeir tjái sig um þau mál sem þeir fjalla um. Það er gerð sú krafa á okkur að við höldum uppi málefnalegri gagnrýni, og það gerðum við. Við erum sýknuð, en samt sem áður fellur á okkur kostnaður þar sem málsvarnarbætur dugðu ekki fyrir málskostnaði. Ég spyr hvar lýðræðið væri statt ef niðurstaðan yrði sú að kjörnir fulltrúar geti átt á hættu að bera kostnað af því að tjá sig í fjölmiðlum eða annarstaðar."

Hópur bæjarbúa hefur leitað til Jóhanns H. Hafstein, lögmanns hjá ERGO, en þeir telja óeðlilegt að opinberir sjóðir séu notaðir til að standa straum af kostnaði við einkamál bæjarfulltrúa. Hann staðfestir í samtali við fréttastofu að niðurstaða bæjarráðs verði kærð til innanríkisráðuneytisins verði hún staðfest í bæjarstjórn.

Hægt er að horfa á viðtal við Guðríði vegna málsins ef smellt er á hlekkinn „Horfa á myndskeið með frétt".