Sómalskir sjóræningjar myrtu fjóra Bandaríkjamenn

Fjórir bandaríkjamenn sem sómalskir sjóræningjar tóku í gíslingu á dögunum hafa verið myrtir. Fólkið, tvær konur og tveir karlar voru á siglingu í kringum heiminn á skútu þegar þau voru tekin höndum á Indlandshafi á föstudaginn var.

Talsmenn bandaríska sjóhersins hafa nú staðfest að fólkið hafi verið skotið til bana þegar viðræður fóru fram á milli sjóræningjanna og sjóhersins um lausn þeirra. Hermennirnir fóru þá um borð í skútuna og fundu lík fólksins. Tveir sjóræningjar voru felldir í skotbardaga í kjölfarið og þrettán teknir höndum.