Pizzuát bjargaði lífi konu

Jean Wilson hafði pantað sér pizzu á Domino's á hverjum einasta degi í þrjú ár og þegar hún hafði ekki hringt í þrjá daga fóru starfsmenn fyrirtækisins eðlilega að hafa áhyggjur af henni.

Á hverjum degi í þrjú ár hringdi Jean og pantaði sér sömu gerð af pizzu. Hún var góður kúnni og þekktu starfsmennirnir hana vel, því hún hringdi alltaf á sama tíma og pantaði sömu gerð af pizzu. Einn daginn hringdi hún ekki og þegar hún hafði ekki hringt í þrjá daga fór pizzasendillinn Susan Guy að heimili hennar.

Eftir að hafa bankað mörgum sinnum á hurðina án þess að Jean kæmi til dyra, fór hún og ræddi við nágranna hennar sem sögðust ekki hafa séð hana í nokkra daga. Hún ákvað því að hringja á lögregluna. Lögreglan kom stuttu síðar á staðinn og braut upp hurðina.

Þar lá Jean á gólfinu, en hún hafði dottið og gat ekki hreyft sig til að hringja á hjálp.

Hún var flutt á sjúkrahús og er líðan hennar stöðug, samkvæmt upplýsingum frá lækni.