Rokkið er dautt

Rokkið er dautt, að minnsta kosti ef marka má breska smáskífulistann fyrir síðasta ár.

Breska bransatímaritið Music Week hefur tekið saman tölur benda til þess að rokkið sé búið að vera en ef litið er á hundrað vinsælustu lögin í Bretlandi á síðasta ári kemur í ljós að rokklög hafa aldrei verið færri. Aðeins þrjú rokklög verma listann. Árið 2009 var ástandið litlu skárra, en þá voru lögin þó þrettán. Þetta er algjört hrun ef litið er til síðustu áratuga og ekki þarf að leita lengra til ársins 2008 til að finna skárra ástand, en þá voru rokklögin á listanum 27. Í fyrra voru Hipp hopp og RnB lög 47, popplög voru 40 talsins og danstónlistargeirinn átti tíu lög á listanum.

Það sem verra er, vinsælasta rokklagið árið 2010 var gamli slagarinn Don't stop believing, með amerísku iðnaðarrokksveitinni Journey.Það var samið fyrir þrjátíu árum en sló í gegn á ný þegar það var tekið fyrir í unglingasápunni Glee. Hin lögin tvö voru Hey, soul sister, með Train, sem fáir rokkhundar af gamla skólanum væru nú til í flokka undir rokk og ról og Dog Days are Over by Florence + the Machine.

Ljósið í myrkrinu er að þótt smáskífur rokkhljómsveita seljist ekki lengur þá seljast stórar plötur slíkra listamanna enn nokkuð vel og rokkhljómsveitum gengur vel á tónleikaferðum. Aðalsprauta Bon Jovi, vinsælustu tónleikasveitar síðasta árs er 48 ára gamall og samkvæmt nýrri skýrslu Deloitte verða 40 prósent af 20 vinsælustu rokktónlistarmönnum þessa árs 60 ára eða eldri. Nýliðun í greininni er því greinilega lítil en fyrir rokkara þýðir lítið annað en að halda í vonina.