Ólafur: Fellur lítið með okkur

„Jafntefli hefði verið frábær úrslit en það hefur ekkert fallið með okkur í keppninni og það þarf gegn þjóðum í þessum styrkleika," sagði Ólafur Jóhannesson, landsliðsþjálfari Íslands, eftir tap sinna manna gegn Portúgal á Laugardalsvelli í kvöld, 1-3.

„Mér fannst mínir leikmenn standa sig vel þó það skorti kannski meiri kraft í okkar leik í síðari hálfleik. Við stóðum vel í þeim í fyrri hálfleik og það var lítið hægt að gera í þessum mörkum sem þeir skora. Það var alltaf von þegar staðan var 1-2 fyrir Portúgala því að þeir eiga það til að svindla varnarlega þegar lítið er eftir og ég batt vonir að geta nýtt okkur það. Við fáum svo á okkur slysalegt mark og þá var vonin lítil."

Staða Íslands í riðlinum er svört og núll stig eftir þrjá leiki er slæm staða eftir leiki við Noreg, Danmörku og Portúgal. Ólafur er þrátt fyrir það bjartsýnn.

„Ég viðurkenni það fúslega að það er djöfull leiðinlegt og fúlt að vera stigalausir eftir fyrstu þrjá leikina en mér finnst við vera á réttri leið. Ég vil meina að það sé bjart framundan hjá okkur þrátt fyrir stigaleysið."