Undirbúa stórárás í Afganistan

Þetta er fyrsta stórárásin sem gerð verður í Afganistan síðan Barack Obama sendi þrjátíu þúsund manna liðsauka til landsins um áramótin.

Skotmarkið er bærinn Marjah í Helmand héraði sem er stærsti bær í suðurhluta landsins sem talibanar ráða.

Íbúarnir eru um áttatíu þúsund en ekki er vitað hversu marga hermenn talibanar hafa þar. Árásin hefur verið vel auglýst í von um að talibanar forðuðu sér þaðan og hægt væri að taka bæinn án bardaga.

Engin merki hafa hinsvegar sést um að talibanar séu að hörfa. Þvert á móti hafa þeir lagt jarðsprengjur utan við bæinn og stöðvað þá bæjarbúa sem reynt hafa að flýja.

Ekki hefur verið gefin upp nein dagsetning fyrir árás NATO herjanna.