Torres með sálfræðilegt tak á Vidic

Martin Keown, fyrrum varnarmaður Arsenal, telur að spænski sóknarmaðurinn Fernando Torres hjá Liverpool hafi sálfræðilegt tak á Nemanja Vidic, varnarmanni Manchester United.

„Miðvarðapar Manchester United, Vidic og Ferdinand, er klárlega með gæði til að glíma Torres. Það er samt eitthvað sem hefur ekki verið að virka þegar þeir mæta honum," sagði Keown.

„Torres hefur farið illa með vörn United í síðustu viðureignum þessara liða. Vidic hefur fengið að kenna illa á því og fengið rautt spjald í síðustu þremur leikjum. Þetta er eitthvað sálrænt, Torres er með tak á honum."

Leikur Manchester United og Liverpool á morgun hefst 13:30.