Ummæli Merkel vekja deilur

BERLÍN, AP Þau ummæli Angelu Merkel, kanslara Þýskalands, að tilraunir til að skapa fjölmenningarsamfélag innan landsins hafi mistekist hrapallega hafa orðið kveikjan að miklum umræðum um stefnu Þjóðverja í innflytjendamálum.

Merkel lét ummælin falla á fundi sínum með ungum meðlimum kristilegra demókrata á laugardag. Með þeim var kanslarinn að bregðast við þeim yfirlýsingum margra þýskra stjórnmálamanna að herða beri lög og reglur um innflytjendur. Nýleg skoðanakönnun leiddi í ljós að um þrjátíu prósentum Þjóðverja þykir innflytjendur í landinu of margir.

Merkel sagði að innflytjendur væru velkomnir í Þýskalandi, en þeir þyrftu þó að læra tungumálið og aðlagast þýskum siðum og venjum. „Fjölmenningarlega nálgunin, að segja að við lifum öll í sátt og samlyndi hlið við hlið, hefur mistekist algjörlega,“ sagði Merkel.

Ummælum Merkel var tekið fagnandi af íhaldssömustu meðlimum kristilega demókrataflokksins. Margir, og þá sér í lagi íbúar heimsborgarinnar Berlín, sögðu í gær að Merkel væri ekki í tengslum við daglegt líf Þjóðverja.

Innflytjendamál komust enn á ný í hámæli í vikunni þegar baulað var á þýska knattspyrnumanninn Mesut Özil, sem er af tyrkneskum ættum, í landsleik milli Þýskalands og Tyrklands á Ólympíuleikvagninum í Berlín. Voru það stuðningsmenn Tyrkja sem bauluðu, en þeir voru fleiri en stuðningsmenn Þýskalands á áhorfendapöllunum.- kg