McLeish hæstánægður með Foster

Alex McLeish, stjóri Birmingham, er hæstánægður með nýja markvörðinn sinn, Ben Foster, sem hann fékk frá Man. Utd. Hann spáir því að Foster muni veita Joe Hart harða samkeppni um markvarðarstöðuna í enska landsliðinu.

Foster ákvað að söðla um í sumar enda var hann ekki að gera annað þar en að fylgjast með af bekknum eða úr stúkunni.

Hann var eitt sinn talinn vera framtíðarmarkvörður landsliðsins en hefur ekki alveg staðið undir væntingum þegar hann hefur fengið tækifæri.

"Við vorum svo heppnir að hafa Joe Hart hér í fyrra og ég tel hann og Ben vera svipaða markverði. Ég held að Ben eigi eftir að standa sig álíka vel hjá okkur og Hart," sagði McLeish.