Hafa Bandaríkjamenn vopnað Geimferju?

Geimferja sem bandaríski flugherinn skaut út í geiminn í dag er eins og smækkuð útgáfa af ferjunum sem Geimferðastofnunin hefur notað undanfarna áratugi.

Annar munur en stærðarmunur er sá að ferja hersins er ómönnuð og getur verið á lofti í allt að sjö mánuði. Þá snýr hún til jarðar og lendir eins og geimferjur NASA.

Flugherinn neitar að gefa nokkrar upplýsingar um þessa ferju. Sem hefur auðvitað leitt til vangaveltna um hvort hún sé vopnuð.

Til er sáttmáli frá 1967 þar sem þjóðir skuldbinda sig til þess að hafa ekki gereyðingarvopn í geimnum eða á tunglinu eða öðrum plánetum.

Bandaríkin hafa hinsvegar neitað að undirrita viðbótarsáttmála sem Kínverjar og Rússar lögðu fram um að hverskonar geimvopn verði bönnuð.

Bandaríkjamenn segjast eiga svo ríkra hagsmuna að gæta í gervihnöttum sínum og geimstöðvum að þeir verði að geta varið þær.

Þetta leiðir svo hugann að því að þegar Barack Obama undirritaði á dögunum samkomulag við Rússa um fækkun kjarnorkuvopna sagði hann frá nýju vopnakerfi sem Bandaríkin væru að þróa.

Það kerfi gerði þeim kleift að gera árás hvar sem er í heiminum klukkustund eftir að ákvörðun væri tekin um slíka árás.