Sannfærðir um að Bernanke haldi áfram í seðlabankanum

Hæstráðendur í Hvíta húsinu í Bandaríkjunum eru sannfærðir um að Öldungadeild Bandaríkjaþings muni staðfesta val forsetans á Ben Bernanke í embætti seðlabankastjóra næstu fjögur árin.

Talsmaður forsetans, Robert Gibbs, segir að endurkjör seðlabankastjórans sé nauðsynlegt til þess að tryggja stöðugleika fjármálakerfisins. Það var George Bush yngri sem valdi Bernanke upphaflega í embætti seðlabankastjóra árið 2006.

Bernanke hefur verið hrósað mikið fyrir störf sín í bankanum. Engu að síður hefur það vakið reiði almennings að fúlgum fjár hafi verið eytt í að bjarga fyrirtækjum í Kauphöllinni á Wall Street á meðan almenningur glímir við atvinnuleysi og húsnæðisvandamál. Þess vegna hafa nokkrir þingmenn úr Öldungadeildinni lýst yfir efasemdum um endurkjör hans.

Starfstímabil Bernankes tekur enda þann 31. janúar næstkomandi.