Hefur áhrif á allt daglegt líf

„Ég held það megi orða þannig að þetta kemur til með að hafa áhrif á allt okkar daglegt líf," segir Elliði Vignisson, bæjarstjóri í Vestmannaeyjum um tilkomu Landeyjahafnar.

Íbúar í Vestmannaeyjum eru 4.200 talsins. Þetta er næst stærsti þéttbýliskjarni landsins utan höfuðborgarsvæðisins og háð samgöngum á sjó umfram önnur byggðarlög. „Samgöngur hafa tafið fyrir allri framþróun á síðustu árum." segir Elliði. „Það horfir hins vegar til breytinga þegar leiðin í land styttist og óþægindi á borð sjóveiki verða minna vandamál."

Ferðum Herjólfs fjölgar líka mikið og sveigjanleiki til komu og borottfarar eykst mjög. „Hagkerfi okkar sem hefur verið einangrað og lokað stækkar verulega. Ég held að það megi færa rök fyrir því að allt frá Selfossi til Víkur í Mýrdal verði eitt atvinnusvæði, það verður hægt að sækja vinnu þangað til Eyja og öfugt."

Elliði segir ferðaþjónustu eitt skýrasta dæmið um þær væntingar sem heimamenn gera til nýrra hafnar. „Á undanförnum mánuðum hafa verið opnuð hér fimm eða sex ný veitinga- og kaffihús, sem sýnir að fólk er að veðja á aukinn straum ferðamanna. Ferðaþjónustan er hins vegar aðeins ein af þeim atvinnugreinum sem fær ný sóknafæri. Vestmannaeyjar eru til dæmis stór matvælaframleiðandi með 13 til 15 prósent af aflaheimildum; fyrirtæki á borð við Grím kokk eiga auðveldara með að koma afurðum á markað auk þess sem aðgeni að aðföngum stóreykst."

Elliði telur að Landeyjahöfn hafi nú þegar haft jákvæð áhrif á bæjarlífið í Eyjum. „Sautján ár í röð fækkaði íbúum en undanfarin þrjú ár hefur þeim fjölgað. Ég tel að það stafi meðal annars af væntingum fólks til Landeyjahafnar og bættra samgangna."