Hodgson þolir ekki lygasögur umboðsmanna

Roy Hodgson, stjóri Liverpool, er mjög reiður út í umboðsmann Hollendingsins Rafael van der Vaart en hann segir umbann hafa logið til um áhuga Liverpool á leikmanninum.

Van der Vaart endaði í herbúðum Tottenham á lokadegi félagaskiptanna og hann hefur síðar háldið því fram að hann hefði verið á leiðinni til Liverpool.

"Það er ekkert til í því. Þessar lygasögur geta verið mjög pirrandi," sagði Hodgson sem er augljóslega búinn að fá nóg af umboðsmönnum knattspyrnumanna.

"Það hringir í mig umboðsmaður og spyr hvort ég hafi áhuga á Van der Vaart. Ég segi nei og mínútu síðar er komin frétt þess efnis að ég hafi áhuga á leikmanninum. Ég bið Van der Vaart afsökunar ef umbinn hans laug að honum. Mér finnst hann vera fínn leikmaður en hann er ekki leikmaður eins og ég var að leita að."