Gylfi búinn að semja við Fylki

Gylfi Einarsson hefur skrifað undir þriggja ára samning við Fylki en hann er nú að snúa aftur heim eftir tíu ár í atvinnumennsku.

Gylfi er uppalinn Fylkismaður en fór frá liðnu árið 2000 og gekk til liðs við Lilleström. Árið 2004 fór hann til Leeds í Englandi en fjórum árum síðar sneri hann aftur til Noregs og leikur nú með Brann.

Þar hefur hann lítið fengið að spila að undanförnu þar sem félagið hefur ekki efni á að greiða honum bónusgreiðslur fyrir hvern spilaðan leik.

Gylfi hefur á ferlinum leikið 24 A-landsleiki og skorað í þeim eitt mark, í 2-0 sigri Íslands á Ítalíu í vináttulandsleik árið 2004.

Gylfi lék á sínum tíma 54 leiki með Fylki og skoraði í þeim átján mörk.