Valdimar Leó færður niður

Valdimar Leó Friðriksson, fyrrverandi þingmaður, sem hafnaði í öðru sæti í prófkjöri Samfylkingarinnar í Mosfellsbæ var færður niður í þriðja sæti á framboðslista flokksins sem samþykktur var á félagsfundi í kvöld.

Valdimar sóttist eftir fyrsta sætinu líkt og Jónas Sigurðsson, sitjandi oddviti. Einu atkvæði munaði á þeim. Jónas sagði í Fréttablaðinu í dag að ekki kæmi til greina að hafa tvo karla í tveimur efstu sætunum. Hanna Bjartmars Arnardóttir, bæjarfulltrúi, sem hafnaði í þriðja sæti hefur talað með svipuðum hætti. Aftur á móti hefur Valdimar sagt eðlilegt að Hanna yrði færð í fyrsta sæti og Jónas í það þriðja enda hefði Jónas sigrað naumlega í prófkjörinu.

Ólafur Ingi Óskarsson, formaður kjörstjórnar, segir að félagsfundurinn hafi verið fjölmennur og að listinn hafi verið samþykktur með öllum greiddum atkvæðum nema tveimur. Hann segir að Valdimar Leó hafi stutt tillögu kjörstjórnar sem fól í sér að hann og Hanna hefðu sætaskipti.

Röð efstu manna:

1. Jónas Sigurðsson

2. Hanna Bjartmars Arnardóttir

3. Valdimar Leó Friðriksson

4. Anna Sigríður Guðnadóttir

Jón Baldvin Hannibalsson, fyrrverandi ráðherra og formaður Alþýðuflokksins, skipar heiðurssæti listans.

Samfylkingin fékk tvo bæjarfulltrúa kjörna í kosningunum í Mosfellsbæ fyrir tveimur árum, Sjálfstæðisflokkur þrjá, Framsóknarflokkur einn og VG einn.