Gerrard: Ekki gera lítið úr Evrópudeildinni

„Það eru margir sem gera lítið úr Evrópudeildinni, ég er ekki einn af þeim. Ég hef lyft UEFA-bikarnum og það er sérstakur titill," segir Steven Gerrard, fyrirliði Liverpool.

Liverpool verður í eldlínunni í kvöld gegn Unirea Urziceni ífrá Rúmeníu í Evrópudeildinni, móti sem hefur verið kallað ýmsum nöfnum, meðal annars „sárabótakeppni" fyrir lið sem ekki eru nægilega góð fyrir Meistaradeildina.

„Ég vona að við náum að vinna þetta mót. Það er stór stund fyrir Unirea að mæta Liverpool og þeir munu leggja sig alla fram til að ná óvæntum úrslitum. Það er samt hættulegt að veðja gegn Liverpool í Evrópukeppni, sérstaklega þegar liðið er með bakið upp við vegg," segir Gerrard.

Liverpool er í harðri baráttu um fjórða sæti ensku úrvalsdeildarinnar. „Við höfum verið óstöðugir á þessu tímabili og gengið ekki samkvæmt áætlun. En við eigum enn möguleika á titli og gefum okkur alla í að landa honum," segir Gerrard.