Synti í jökullóni á Everest

Breskur maður sem berst fyrir umhverfismálum varð í gær fyrstur manna til að synda í jökullóni á Everest fjalli. Hinn fertugi Lewis Gordon Pugh synti einn kílómeter yfir Pumori vatnið sem er í 17.400 feta hæð.

Sundið tók tæplega 23 mínútur og kappinn klæddist eingöngu sundskýlu, gleraugum og sundhettu. Pugh sagðist vilja vekja athygli á bráðnun jökla í Himalayafjöllum og þverrandi vatni á svæðinu. Hann hefur bæði synt á Suður- og Norðurpólnum til að vekja athygli á umhverfismálum.

Sundið á Everest tók þó meira á en pólasundið, þar sem hann þurfti að komast yfir hæðarveiki auk hitastigs vatnsins sem var einungis tveggja gráðu heitt. Læknir á staðnum sagði að sundið hefði að öllum líkindum gengið að venjulegum sundkappa dauðum. Að synda of hratt hefði leitt til skorts á súrefni, en að synda of hægt hefði getað leitt til ofkælingar.