Ipod er að eyðileggja fótboltann

Dave Kitson, framherji Stoke City, er ekki par sáttur við Ipod-væðinguna í fótboltanum. Hann segir ipod vera að eyðileggja fótboltann.

Það er orðin viðtekin venja að sjá knattspyrnumenn með Ipod í eyrunum fyrir leiki og þeir einangra sig síðan í klefanum með tónlistina í eyrunum.

"Ipod er það versta sem hefur komið fyrir stemninguna í búningsklefanum. Það drepur alla stemningu og menn hætta að blanda geði við hvorn annan," sagði Kitson.

"Þegar menn eiga að vera að peppa hvern annan upp eru þeir að hlusta á tónlist. Venjulega líta þeir síðan út fyrir að vera þunglyndir með þetta í eyrunum.

"Tónlist getur hjálpað en þá þegar allir hlusta á sömu tónlistina. Tónlist á síðan að espa menn upp en ekki róa menn niður. Það er ekkert rólegt við fótbolta."

Landsliðsþjálfarar Íslands í knattspyrnu, Ólafur Jóhannesson og Pétur Pétursson, bönnuðu einmitt Ipod í búningsklefa landsliðsins er þeir tóku við liðinu. Það hefur litlu skilað og spurning um að leyfa notkun tækjanna á nýjan leik?