Ekki væntanlegt tilboð strax frá Rauðu riddurunum

Rauðu riddararnir er hópur fjárfesta sem hyggst gera tilraun til að bjarga Manchester United úr greipum Glazer-fjölskyldunnar.

Í tilkynningu frá hópnum sem gefin var út í morgun er tilkynnt að ekki sé tilboð væntanlegt strax.

„Við munum halda áfram okkar starfi en reiknum ekki með að gera tilboð í félagið áður en yfirstandandi tímabili lýkur," segir í tilkynningunni. United hefur verið í eigu Glazer-fjölskyldunnar síðan 2005.

Stuðningsmenn félagsins eru flestir allt annað en sáttir við eignarhaldið enda halda skuldir United áfram að hrannast upp. Rauðu riddararnir er hópur skipaður ríkum stuðningsmönnum United.