Hundruð fyrirtæki talin hafa greitt út ólögmætan arð

Grunur leikur á að hundruð fyrirtækja hafi greitt út ólögmætan arð sem nemur nokkrum milljörðum króna á undanförnum árum. Ólögmætar arðgreiðslur verða í flestum tilvikum skattlagðar sem launatekjur og beinist skattlagningin að þeim sem þær fengu. Skattyfirvöld hyggjast skoða arðgreiðslur fimm ár aftur í tímann.

Stjórnir félaga gera árlega tillögu um hversu mikinn hluta af hagnaði liðins árs eða liðinna ára skuli greiða hluthöfum í arð. Úthlutunin byggist á samþykktum ársreikningi liðins árs.

Samkvæmt hlutafélagalögum má ekki greiða út arð á fyrsta starfsári félags. Þá má ekki greiða út arð ef fyritækið hefur verið rekið með tapi eða ef arðgreiðslustofninn er neikvæður.

Samkvæmt heimildum fréttastofu hafa skattyfirvöld komist að raun um að hundruð fyrirtækja hafa ekki farið eftir lögunum og greitt út ólögmætan arð. Skattyfirvöld hyggjast fara í nánari skoðun á málinu og verða arðgreiðslur síðustu fimm ára skoðaðar. Bráðabirgðaniðurstöður benda til að þarna liggi ósóttir skattstofnar upp á nokkra milljarða króna.

Einnig mun vera nokkuð um að félög hafi greitt út arð af matsbreytingum eigna án þess að hafa talið þær matsbreytingar til skattskyldra tekna. Skattyfirvöld telja að það sé forsenda arðgreiðslu að tekjur hafi verið innleystar og hafi arði verið úthlutað af matsbreytingum eigna beri fyrirtækjum sem það gerðu að greiða skatta af matsbreytingunum.

Alla jafna þarf að greiða fjármagnstekjuskatt af arðgreiðslum. Sá skattur nam lengi vel 10% en nemur í dag 18%. Verði það niðurstaðan að um ólögmætar arðgreiðslur sé að ræða eru þær skattlagðar sem launatekjur, eða í u.þ.b. 40% skattþrepi. Ofan á það hafa skattyfirvöld heimild til að leggja 25% álag. Skattálagningin mun í flestu tilvikum beinast að þeim sem fengu arðreiðslurnar.