West Ham kvartar yfir Fulham

West Ham hefur lagt fram formlega kvörtun til ensku úrvalsdeildarinnar vegna þess að Roy Hodgson, stjóri Fulham, ákvað að tefla fram veikara liði í tapleiknum gegn Hull síðasta laugardag.

Hodgson hvíldi fimm sterka leikmenn sem hjálpaði Hull að vinna 2-0 sigur og er Hull nú búið að jafna West Ham að stigum í botnbaráttu deildarinnar.

Bobby Zamora, Danny Murphy, Damien Duff, Aaron Hughes og Dickson Etuhu voru ekki með gegn Hull en léku síðan á fimmtudagskvöld þegar Fulham vann 2-1 sigur gegn Wolfsburg í Evrópudeildinni. Næsta skref hjá ensku úrvalsdeildinni er að leita skýringa hjá Fulham en í reglum stendur að öll lið verði að tefla fram sínu sterkasta liði í öllum leikjum.

Ef talið er að Fulham hafi brotið þessa reglu mun félagið fá 25 þúsund punda sekt líkt og Wolves fékk fyrr á tímabilinu þegar Mick McCarthy gerði níu breytingar á liði sínu fyrir leik gegn Manchester United.