Úlfarnir sóttu stig á Villa Park

Fyrsta leik dagsins í ensku úrvalsdeildinni lauk með jafntefli 2-2. Það var viðureign Aston Villa og Wolves.

Úlfarnir eru í harðri fallbaráttu en Villamenn berjast um fjórða sæti deildarinnar.

Heimamenn komust yfir á Villa Park en þá skoraði John Carew á 16. mínútu. Gestirnir jöfnuðu sjö mínútum síðar og var þar að verki Jody Craddock.

Á 38. mínútu komust Úlfarnir yfir en þá varð James Milner fyrir því óláni að skora sjálfsmark. Það kom sending fyrir markið og Milner straujaði hann skemmtilega inn.

Aston Villa sótti stíft í seinni hálfleik en skoraði aðeins eitt mark. Það gerði hinn norski Carew átta mínútum fyrir leikslok og úrslitin 2-2.